Со развиорени знамиња, патриотски песни и транспаренти. Македонија библиска, а не нова. Почна собирот во центар на Скопје, плоштадот „Пела“. Го организираа група граѓани, целта е да се испрати порака, „Македонија, Македонски, Македонци - само тоа признаваме“.

Отворена поддршка на армиите од Македонија, Албанија и Хрватска за добивање на покана за членство во НАТО на претстојниот Самит во Букурешт, изрази германскиот Бундесвер. Ваква порака добија вчера во Берлин началникот на ГШ на АРМ, генерал потполковник Мирослав Стојановски и началниците на ГШ на армиите на Албанија и Хрватска на средбата со првиот човек на Бундесверот, генерал Волфганг Шнајдерхан.

По исчезнувањето пред осум денови на 23-годишниот Јорго Танос од село Вевки, Леринско, цела северна Грција е крената на нозе во неговата потрага. Грчката полиција со хеликоптери и кучиња трагачи ја пребарува пограничната зона со Македонија, а се празнат и неколку акумулации.

Со воведување етнички смени во кои поделени ќе учат Македонците и Албанците, кои во училиштата ќе влегуваат низ одвоени влезови, со видео надзор и засилено обезбедување. Вака средношколците во „Нико Нестор“ и „Ибраим Темо“ во Струга ќе се штитат од тепачки и инциденти, кои вчера завршија со двајца повредени ученици и четворица однесени во полиција, по што наставата беше прекината два дена и таа треба да продолжи во четврток.

Хашките досиеја од пред неколку дена ги чува в.д. амбасадорот во Холандија Шпреса Јусуфи. Таа не кажува дали четирите големи кутии со материјалите за „Липково“, „Раководството на ОНА“, „Градежните работници на Маврово“ и „Непроштено“ се уште се во амбасадата или ги пренесувала на друго место.