Група од три македонски издавачи и три печатници обвини дека тендерот за издавање на 131 том македонска книжевност е незаконски доделен на печатницата „Микена“ од Битола. „Табернакул“, „Магор“, „Темплум“, „Слово“, „Македонска реч“, „Логос А“ и трите печатници „Југореклам“, „Абакус“ и „Наумовски“, заеднички конкурирале за овој проект, според нив вреден околу милион евра. Тие и „Микена“ биле единствени понудувачи. Според Каранфиловски, „Микена“ не ги доставила потребните документи и дала нереално ниска цена од 21 милион денари, што било за 803.000 денара помалку од второрангираната група издавачи.

Изборите ја поделија Нова Социјалдемократска партија. Тито Петковски ќе коалицира со СДСМ, министерскиот ешалон формираше фракција. Не сака на 1-ви јуни да настапи со Коалицијата за Европа, туку да настапи самостојно. „Тоа е само една кулминација во којашто ескалираат сите тие концепциски разлики и во таа насока ние го користиме своето статутарно право денеска да прогласиме фракција и да продолжиме со малцинско дејствување во рамките на партијата, согласно Статутот на НСДП“, изјави Лазар Еленовски, НСДП.

Денеска во посета на Ресен престојуваше претседателот на Турција, Абдула Ѓул, што е прва посета на еден државник во историјата на оваа општина. „Почестени сме денеска што ја имаме ретката прилика, за прв пат во општина Ресен да престојува Претседател на Република Турција. Неслучајно е Ресен одбран, бидејќи Ресен е показател на една позитивна клима којашто со векови владее тука помеѓу луѓето и е пример, не само за Македонија, туку и пошироко, на кој начин се развиваат взаемните односи помеѓу луѓето“, изјави Димитар Бузлевски, градоначалник на Ресен.

Со исклучок на Италија и Романија, кои поради обврските на претседателите Наполитано и Башеску, ќе бидат претставени на ниво на амбасадори, се очекува во Охрид да пристигнат 17 шефови на држави од Централна и Југоисточна Европа, кои утре и задутре ќе дебатираат за најголемите прашања на денешницата. На охридскиот аеродром се очекува да пристигнат претседателите на Хрватска, Молдавија, Бугарија, Чешка, Црна Гора, Словачка, Србија, Австрија, Германија, Украина, Унгарија, Полска, Босна и Херцеговина, Албанија и Турција.

15 патнички возила со македонски регистерски ознаки, денеска во раните утрински часови биле вратени од граничниот премин Евзони на македонско-грчката граница, со образложение дека патниците не поседуваат доволно пари за да влезат во Грција. Според цариниците, на кои им се пожалиле македонските државјани, грчките полицајци им барале да покажат од 2.000 до 3.000 евра по патник.

Велешката полиција сомничи инспектор од велешката Управа за јавни приходи дека сексуално малтретирал вработена во трафика. Според кривичната пријава, инспекторот П.Д. (56) на 22-ри овој месец влегол во трафиката на покана од продавачката Б.С. со чии родители инспекторот бил и куќен пријател. Откако таа на еден муштерија не му дала фискална сметка за купен производ, инспекторот почнал да ја смирува велејќи и дека нема потреба да се грижи, затоа што нема да ја пријави.