|
Агресивни кампањи против абортусот. Скопје е преполно со постери на кои на едната страна има слика на бебе, а на другата фетус. Кој стои зад сево ова? Повторно се отвори темата за оправданоста на абортусот. Дали жената има право на избор или, пак, прекинувањето на бременоста е рамно на убиство? За оваа тема отсекогаш постоеле различни ставови. Експертите за човекови права на оваа тема гледаат од два аспекта. Едниот е здравјето на жената, кое може да биде загрозено со бременоста, а другиот е нејзиното право да одлучи.
Со забрана на абортусот се нарушува и нејзиното право на избор. „Во случајов правото на избор дефинитивно се доведува до прашање доколку го ограничиме слободното избирање дали жената ќе абортира или не, заради тоа што ние треба да ги стимулираме жените сами да решаваат за одредени работи во услови кога се дестимулирани за вакво решавање во секојдневниот и во јавниот живот“, изјави Мирјана Најчевска, експерт за човекови права. И гинеколозите се на ставот дека абортусот има своја оправданост. Од една страна, жената има законско право до 10-та недела сама да реши дали сака да ја продолжи или прекине бременоста. За поодминатата фаза одлучуваат докторите, доколку откријат аномалии на плодот. „Може да е поврзано со силување, може да е поврзано со желбата на двајцата партнери, истовремено и со социо-економскиот момент којшто постои во нашата земја“, рече Адела Стефанија, директор на Клиниката за гинекологија. „Сепак, тоа претставува право на бремената жена и право на избор на понатамошен сопствен живот. Посебно тука треба да нагласиме за малолетничките бремености, кога самото дете раѓа дете“, додаде Стефанија. Абортусот отсекогаш бил осудуван од црквата. Тие се на ставот дека тоа е рамно на убиство. „Ослободувањето од фетусот, почнувајќи без разлика во кој период на бременоста, претставува чин на класично убиство“, вели Стојко Ристовски, МПЦ. Во Македонија нема точни податоци бројот на абортуси. Само на Клиниката за гинекологија оваа година абортирале 1.700 жени. Од нив 88 се девојчиња под 18-годишна возраст. Голем дел од жените, особено малолетнички, прекинот на бременоста го прават во диви ординации. Во Европа абортусот до 10-та недела е дозволен секаде, освен во Ирска.
|
Дирекцијата за храна која е должна да ја контролира безбедноста на храната, сега ќе ги учи гр...
