 Денеска во земјава се гласаше и по трет пат. Предвремените парламентарни избори, кои започнаа на 1 јуни, по еден месец конечно завршија. Евроамбасадорот Фуере, кој го набљудуваше процесот од самиот почеток, разочаран што земјава се уште не може да организира избори кои ќе завршат во еден ден.
На власта и на политичките партии им порача да направат огромен напор, насилствата и нерегуларностите повеќе никогаш да не се повторат. Тоа е важно, порачува Фуере, зошто веќе на пролет земјава повторно ќе биде на испит да организира фер и демократски избори. „Ова е долг, предолг изборен процес. Ова е трет ден на гласање на изборите кои требаше да се завршат во еден ден. И покрај тоа, Државната изборна комисија направи големи напори да обезбеди најдобри услови да не се повторат насилствата и нерегуларностите, а истото се однесува и на полицијата“, изјави Ерван Фуере, евроамбасадор во Македонија. Претседателот на ДИК, Јосифовски, и покрај се, оптимист. Очекува конечната оценка за предвремените парламентарни избори, сепак да биде позитивна. „Крајот, сепак, на овие избори ќе биде како што треба и со тоа ќе покаже Република Македонија дека и изборните органи и другите државни органи функционираат како што треба и дека сепак, впечатокот во целина ќе биде дека Република Македонија има капацитет, може и мора да спроведе мирни, фер и демократски избори“, рече Јован Јосифовски, претседател на ДИК. Фуере и Јосифовски ги посетија двете избирачки места во скопско Бојане, на кои гласањето и денеска не помина без проблеми. Во едното имало прекин од два часа бидејќи 20-годишен жител на селото, Невљун Абдулахи, шофер во Министерството за труд и социјала, се обидел да гласа и за сопругата. Во второто имало прекин од 45 минути оти некој ги расфрлил гласачките ливчиња. „Околу 7:15 имаше мал инцидент, непознато лице влезе во избирачкото место, ги зема гласачките ливчиња, ги фрла тука на подот и тогаш се прекина два часа изборниот процес“, вели Екрем Мисими, избирачки одбор 2446. „Утрово имавме еден мал инцидент, во кој го затворивме гласачкото место 45 минути, но сега се решија сите проблеми и си тече гласањето најнормално“, рече Александар Христовски, избирачки одбор 2445. По расчистувањето на инцидентите, гласањето продолжи вообичаено. Тоа ќе трае и по 19 часот вечерва, за исто толку време колку што траеле и прекините. Во првата изборна единица се прегласуваше уште и во Радуша и Сарај, на по едно гласачко место. Резултатите од сите четири места во единицата, што според најавите, ДИК ќе ги соопшти доцна вечерва, ќе одлучат која од албанските партии ќе го добие уште еден мандат.
|
Дирекцијата за храна која е должна да ја контролира безбедноста на храната, сега ќе ги учи гр...
