 Цената на суровата нафта на светските берзи се очекува наскоро да се стабилизира на 132 долари за барел, прогнозира Славе Ивановски, претседател на Регулаторната комисија за енергетика. Од ноќеска на полноќ бензините поскапеа за два денари, а дизелот и екстра лесното гориво за денар и половина, со што горивата во земјава ќе се продаваат по рекордни цени во малопродажбата.
Регулаторната комисија за енергетика вчера одлучи малопродажните цени на бензините во просек да се продаваат поскапо за 1,96 отсто. По новите поскапувања, моторниот бензин МБ-96 сега се продава за 80,5 денари за литар, безоловниот бензин ЕУРОСУПЕР-95 ќе чини 77,5 денари, а цената на ЕУРОСУПЕР-98 од 76,5 се зголеми на 78, 5 денари за литар. Повисока ќе биде и цената на дизелот и ЕУРОДИЗЕЛ-от сега се продава по 76 денари за литар. Цената на мазутот се зголемува за 3,2 денари и ќе чини 35,608 денари за килограм, а корекција ќе има и кај цената на екстра лесното масло за домаќинствата (ЕЛ) кое сега ќе чини 64,5 денари за литар. Според претседателот на Регулаторната комисија за енергетика, Славе Ивановски цената на суровата нафта на светските берзи се очекува наскоро да се стабилизира на 132 долари за барел.
-Оваа цена се очекува да биде постојана во наредните два месеци - прогнозира Ивановски. Тој вели дека во таа насока водат сите официјални дискусии што деновиве се водат од страна на релевантните светски фактори кои се дел од нафтениот бизнис. Спротивно на прогнозите на Ивановски, рускиот аналитичар Дмитриј Љутјагин од московската компанија "Велес Капитал" најавува дека неделава суровата нафта ќе достигне рекордна цена од 145 долари за барел. Тој смета дека неминовно ќе престои раст на цената на нафтата пред се поради најавените штрајкови на работниците на "Шеврон" во Нигерија, што се очекува да резултира со намалување на понудата на енергенсот на берзите. Дел од енергетските експерти, пак, сметаат дека вештачки се дига цената нафтата, особено од страна на поголемите светски играчи бидејќи на нив високите цени им одговараат. Според нив, Русија има бенефит од овие поскапувања оти тие ја формираат цената на гасот по формула која, пак, е директно зависна од цената на црното злато. Русија е најголемиот производител на природен гас во светот и сигурно дека повеќе ќе инкасира пари во државната каса ако гасот има повиосока цена. На светските берзи, вчера нафтата се продаваше за околу 136 долари за барел. На почетокот на минатата недела суровата нафта достигна рекордна ценаод 139,89 долари за барел што предизвика светска паника. На експертската средба во Џеда повеќето нафтени компании, кои остваруваат рекордни профити од високата цена на енергенсот, се заложија за стабилизација на понудата и на цената на нафтата. Претставниците на Саудиска Арабија токму во Џеда најави дека ќе го зголемат дневното производство на енергенсот во јуни, за да се стабилизира цената на нафтата. Во моментов Саудиска Арабија произведува околу 9,7 милиони барели нафта дневно, што ја прави земјата водечки производител во светот.
|
Дирекцијата за храна која е должна да ја контролира безбедноста на храната, сега ќе ги учи гр...
