|
 Отровниот кинески кујнски прибор при долготрајна употреба доведува до оштетувања на мозокот и на коскената срж, велат докторите. Амините откриени во него имаат токсично дејство врз централниот нервен систем и коските. Опасните отровни амини можат да предизвикаат зависност 300 пати поголема и појака од онаа на морфиумот. „Континуирана изложеност на зголемена концентрација на овие амини може да доведе до оштетување на централниот нервен систем. Кога зборувам за централен нервен систем, прво мислам на кората на големиот мозок и оштетување на коскената срж“, изјави Антон Чибишев, директор на Клиниката за токсикологија.
Докторите смируваат, краткотрајна употреба на овој прибор не може да има последици по здравјето. Граѓаните кои го употребиле можат да се прегледаат на Токсикологија, за да се утврди дали отровниот амин предизвикал оштетувања. „Од еднократна употреба или употреба во краток временски период, седум или десет дена, не би требало да има никакви штетни последици“, рече Чибишев. Од Дирекцијата за храна велат дека при увоз пластичниот кујнски прибор содржел декларација, која потврдува дека бил испитуван. Откако било испратено известувањето од ЕУ, веднаш бил повлечен од употреба. Секој производ при увоз се контролира. Кај сомнителните се земаат и мостри за испитување. „Штом има сертификат за безбедност, претходно следеле анализи и институцијата којашто го издала сертификатот за безбедност стои зад тие анализи. Меѓутоа, може да стане збор само за една серија“, вели Станислава Лазаревска, директор на Дирекција за храна. Во петокот, по предупредувањето од Брисел, пластичниот кујнски прибор беше повлечен од маркетот во „Рамстор“. Увезени се 144 парчиња, од кои четириесетина биле продадени.
|
„Медијаторот Метју Нимиц на претставниците на Грција и на Македонија утре и задутре во Њу...
