|
 Овонеделната изјава на претседателот на Европската комисија Жозе Мануел Баросо дека Норвешка може да влезе во ЕУ „кога ќе посака“, не ги импресионираше Норвежаните, бидејќи мнозинството и понатаму се противи на влез во ЕУ. Најновото истражување покажа дека влезот во ЕУ не го одобруваат околу 51% граѓани, додека 37% тоа го сметаат за добра можност.
Со нафта богатата Норвешка веќе два пати на референдум - 1972 и 1994 година рече „не“ на ЕУ, а нејзините жители, благодарение на високиот стандард, според кој со години се на чело на светската ранг листа и понатаму не размислуваат за промена на статусот. „Немаме никаква потреба да влегуваме во ЕУ. Унијата е привлечна за оние кои имаат економски проблеми, како Турција и другите балкански држави, ние во таа смисла не би добиле ништо“, вели 40-годишниот инженер од Осло, не криејќи дека е противник на приклучување на Норвешка кон ЕУ. Богатството на Норвешка е во огромните количества на нафта и гас, со чиј извоз остваруваат баснословна заработка. Овие енергенси се темел на високо развиената „држава на благосостојба“, односно на систем на социјална заштита каков што нема ниедна држава во ЕУ. Иако експертите проценуваат дека норвешките резерви на нафта се доволни за најмалку 70 следни години, а гас за цел век, во Северното Море продолжува потрагата за нови извори, кои најчесто се успешни. Во тоа море има и огромно рибно богатство полно со разни видови риби, кои Норвежаните ќе мора да го делат со другите земји, ако нивната земја би влегла во ЕУ. Наспроти заложбите на проевропските групи и поедини политичари, прашањето за влез на Норвешка во ЕУ, не е на листата ни на долгорочните национални прашања. Во таа смисла ништо не промени ни фактот дека актуелниот премиер од редовите на лабуристите, Јенс Столтенберг е заговорник за пристап кон ЕУ. Тој не крие дека на последниот референдум гласал за влез во ЕУ и дека тоа и понатаму го смета за „најдобро решение“, но го почитува поинаквото расположение на мнозинството од сонародниците. Коалиционата влада на Столтенберг, во која се социјалистите и центристите, се обврза, прашањето за приклучување кон ЕУ да не се покренува до крајот на мандатот. Аналитичарите забележуваат дека причина за одбивање на влез во ЕУ од страна на Норвешка, претставува и нивната нагласена желба за независност од кој било, која континуирано е засилувана од 1905 година, кога се одвоија од Шведска. Имено, многумина сметаат дека со влезот во ЕУ нивната земја би била под целосна контрола од Брисел и затоа на тоа се противат. Баросо истакна дека Норвешка би имала голема значајна улога на меѓународната сцена и економските прашања кога би биле во ЕУ. Норвешка сега е дел од Европскиот договор за трговија, но нема можност да учествува во донесување на прописи со кои се регулираат односите на пазарот на Унијата. Неодамна во Норвешка е емитуван радио-скеч, чие дејствие се однесува на 2015-та. Неговата поента е во соопштението дека Норвешка се уште не е во ЕУ, а дека молба за прием поднесе Чад.
|
„Медијаторот Метју Нимиц на претставниците на Грција и на Македонија утре и задутре во Њу...
