Македонија во текот на оваа и наредната година ќе оствари стопански раст од 4,5% односно 5%, предвидуваат експертите на Меѓународниот монетарен фонд. Во анализата на движењето на европската економија објавена денеска на интернет-страницата на ММФ, се проценува дека Хрватска во истиот период ќе оствари четири, односно шест проценти, додека Србија 4,3% во 2008 односно помалку од 4% во 2009.

Бизнисмените бараат Грција да запре со трговските блокади за Македонија. Стопанската Комора се надева дека бариерите од грчка страна се неразумни испади на неодговорни поединци и институции и дека зад нив не стои грчката Влада. Во писмото до Унијата на грчките трговски и индустриски комори, Азески апелира до неговиот колега Касиматис, да се заложи да се елиминираат бариерите што ја кочат економската соработка. Се бара итна средба меѓу двете страни.