Васил Тупурковски е обвинет за осум случаи во кои ја злоупотребил службената положба. Ќе му се суди за тајванските кредити, кои како директор на Агенцијата за обнова и развој им ги доделил на следниве фирми: „Алмако вино био“, „Пикон“, „Интер унија“, „ИФВ“ од Кавадарци, „Био“ од Охрид, како и за кредитите на три живинарски фарми: „Породин“, „Дихово“ и живинарската фарма од Гевгелија. Обвинителството, како што вчера објави А1, за злоупотреба на функцијата го товари и заменикот на Тупурковски, Јован Андонов Реган. Тој ќе одговара за финансиски малверзации во еден случај.

Турканици, метеж и нервозни граѓани пред ликвидираната „Македонска банка“. Почна исплатата на штедачите, чекаа повеќе часови за да дојдат до парите кои име беа заробени. „Два часа чекам и смрзнав, од Драчево дојдов за моите пари да се ги земам. Не давам ништо веќе, на никого, на ниедна банка. Веќе не веруваме нигде, ни дома ни надвор“, велат штедачите.

Денеска во преспанското село Лемос во Грција, преку граничните општини од преспанскиот регион, Преспа од Грција, Пустец од Албанија и Ресен од Македонија, за прв пат во неколку годишната соработка потпишаа заеднички протокол за подобрување и продлабочување на меѓусебните односи. Бидејќи преспа е единствена географска целина, од денеска па во иднина заеднички ќе ги планираат активностите за заштита на животната средина и културното наследство, подобрување на туристичките услуги во регионот, развој на трговските и економските врски и подобрување на пристапната инфраструктура.

Потерница по Владислав Тамбурковски распиша денеска полицијата, но наместо во странство, ќе го бара во земјава, иако тој веќе две години живее во Бугарија. Пред месец и пол А1 го пронајде поранешниот стечаен управник на Топилница „Експорт-импорт банка“, „Газела“ и „ФАС“, во Благоевград, соседна Бугарија. Човекот кој во Македонија е осудуван за финансиски малверзации, станал професор по стечај на Американскиот универзитет во Благоевград.

Агресивни кампањи против абортусот. Скопје е преполно со постери на кои на едната страна има слика на бебе, а на другата фетус. Кој стои зад сево ова? Повторно се отвори темата за оправданоста на абортусот. Дали жената има право на избор или, пак, прекинувањето на бременоста е рамно на убиство? За оваа тема отсекогаш постоеле различни ставови. Експертите за човекови права на оваа тема гледаат од два аспекта. Едниот е здравјето на жената, кое може да биде загрозено со бременоста, а другиот е нејзиното право да одлучи.

Гувернерот Гошев станал сопственик на земјиште во Гевгелиско, регион познат како македонски Лас Вегас. За само 5.000 евра купил атрактивна локација поголема од 9.000 квадратни метри во близина на граничниот премин Богородица.