Бројот на затруени со еклери драматично се зголемува. 87 луѓе, од кои повеќето деца од скопските населби Чаир, Шуто Оризари и Сингелиќ, побарале лекарска помош на Клиниката за инфективни болести. Половината од нив во тешка здравствена состојба се задржани на лекување поради повраќање, висока температура, болки во стомакот, дијареја. Кај сите е пронајдена бактеријата салмонела.

Евроамбасадорот Ерван Фуере побарал официјално толкување од Брисел дали измените на Законот за следење на комуникациите, кои стапија на сила од денеска, ги загрозуваат правата и слободите на граѓаните. Забелешките, кои според дипломатски извори, ќе бидат испишани на педесетина страни, се очекува да пристигнат во текот на неделава.

Спорот за името и уставното име на Македонија не се споменати во изборната програма на американската Републиканската партија. Македонија индиректно се споменува во делот посветен на проширувањето на НАТО во кој се вели дека Алијансата е отворена за сите демократски нации што ги делат американските вредности и ги имаат исполнето критериумите за членство.

Цената на задолжителното осигурување за возила ќе се намали за околу 30 проценти, а одлуката треба да ја донесе Владата идната недела. Тоа значи дека полисата која сега изнесува 5.100 денари, ќе чини 1.500 денари помалку. Граѓаните очекувано го поздравуваат намалувањето на цената.